HMS vekur athygli á innköllun á Girl's Kent Cupcake 16" reiðhjóli. Varan var seld í verslunum BYKO og hugsanlega fleiri stöðum. Ástæða innköllunar er sú að við skoðun á bremsupúðum kom í ljós að þeir innihalda asbest. Einnig kom í ljós að hjólið uppfyllir ekki kröfur staðalsins EN ISO 8098:2023 sem kveður á um öryggiskröfur varðandi reiðhjól fyrir ung börn. Við notkun hjólsins getur skapast hætta fyrir börn sem getur leitt til alvarlegra meiðsla. Eigendum reiðhjólsins er bent á að hætta notkun hjólsins þegar í stað. Ef reiðhjólið var keypt í verslunum BYKO má skila reiðhjólinu í næstu BYKO verslun.

Vakin er athygli á innköllun á trépúsli frá Jabadabado. Púslið er með 7 mismunandi púslum m.a. kanínu, einhyrning, svan, bangsa, regnboga, tungl og stjörnu. Hættan af púslinu er sú að eyrun á kanínunni geta auðveldlega brotnað af og börn nálgast smáa hluti sem geta valdið köfnun. Púslið var selt í BíumBíum hérlendis og hugsanlega á fleiri stöðum.

HMS vekur athygli á innköllun á Stanley kaffimálum. Tvær tegundir af kaffimálum eru innkallaðar, Trigger Action Travel Mug og Switchback Travel Mug. Hætta á brunaslysi getur fylgt notkun á kaffimálunum þar sem lok á kaffimálinu getur rýrnað við hita og tog, sem getur aukið líkur á að vökvi leki og valdið brunaáverkum. Töluverður fjöldi tilvika hefur verið skráð vegna slysa af völdum kaffimálanna. Notendum er bent á að hætta notkun á kaffimálunum þegar í stað. Vitað er að Stanley Trigger Action Mug var seldur hérlendis í Elko, Útilíf, Dimm, og ORG. Innflutningsaðili Stanley er Manna ehf. Neytendum er bent á að vera í sambandi við söluaðila til að fá afhent ný lok. Seld hafa verið 506 stk hérlendis af Stanley Trigger Action Mug. Einnig er hægt að hafa beint samband við Stanley í gegnum síðuna Home | Stanley Recall til að fá frekari upplýsingar. Innköllunin á við um 17 framleiðslunúmer sem sjá má frekar fyrir neðan. Framleiðslunúmerið má sjá á botni kaffimálsins

Vakin er athygli á innköllun á tréleikföngum sem eru grænmeti í trékassa sem seld voru í Flying Tiger Cophenhagen. Hættan af leikföngunum er sú að sumt grænmetið er ekki nógu vel fest saman. Það getur losnað í sundur og börn nálgast smáa hluti sem getur valdið köfnun. Seld hafa verið 118 leikföng hérlendis. Flying Tiger brást fljótt við og hóf innköllun hérlendis á leikfanginu í desember.

Með vörunni fylgdu ekki fullnægjandi notkunnarleiðbeiningar, við ákveðnar aðstæður getur rólan leitt af sér mögulega hengingahættu. Vegna þessa ágalla hefur framleiðandi ungbarnarólunar, Lillagunga, sent út frekari leiðbeiningar til að minnka áhættu á mögulegri hengingarhættu. Ef varan er hengd of hátt getur þríhyrningurinn fyrir ofan ruggustólinn skapað hættu á því að höfuð og háls festist. Slík aðstæða getur komið upp ef barn nær að klifra upp úr rólunni og reynir að fara niður með fæturnar á undan sér í gegnum umræddan þríhyrning. Líkaminn gæti komist í gegn, en höfuðið festst. Ef barnið finnur ekki fótfestu í þessari stöðu, getur þríhyrningurinn skapað köfnunarhættu. Til að forðast hættulegar aðstæður ítrekar framleiðandi vörunnar að notendur rólunnar verði að fylgja eftirfarandi leiðbeiningum Rólan skal hengd upp í hæðinni 35–36,5 cm frá jörðu. Öryggisbeltið verður alltaf að vera notað þegar rólan er í notkun. Barnið má aldrei vera eitt í rólunni. Hægt er að sjá frekari leiðbeiningar um rétta uppsetningu og notkun rólunnar á tengli neðst í tilkynningunni.

Vakin er athygli á innköllun á Mini matarstól. Hættan af matarstólnum er sú að hann getur oltið þegar bakið á stólnum er í hallandi stöðu. Barnið gæti orðið fyrir skaða ef stóllinn fellur aftur á bak. Unnið er með innflutningsaðila við innköllun vörunnar. Stólinn var seldur í verslun Ólavíu og Olivers. Eigendur stólsins eru hvattir til að hafa samband við Ólavíu og Oliver í gegnum netfangið oo@oo.is

Fyrr í ár sendi HMS tvær tegundir af Roarlabs rafrettum í prófun til að meta öryggi þeirra. Í ljós kom að rafretturnar geta verið hættulegar börnum. Við fallpróf opnuðust rafretturnar sem gerir það að verkum að börn eiga greiða leið að nikótínvökva. Nikótín fer greiðlega í gegn um húð auk þess sem aðlaðandi lykt og bragð af nikótínvökva eykur líkurnar á því að börn drekki vökvann. Áhrif nikótíns á börn eru vel þekkt og geta afleiðingar nikótíneitrunar verið mjög alvarlegar. Dufland ehf. flutti þessar rafrettur inn og brugðust skjótt við athugasemdum HMS. Vörurnar voru fjarlægðar af markaði og í kjölfarið var þeim eytt. Rafrettur eiga að þola föll úr eins meters hæð sama hvort rafrettan lendi upp á rönd, flöt eða í 45° án þess að þær leki eða opnist. Forvitnir geta því auðveldlega framkvæmt fallpróf heima hjá sér.

Við viljum vekja athygli á því að leikföng frá Miniverse, sem innihalda resín í fljótandi formi, geta verið varasöm í notkun. Fljótandi resín getur: Valdið ertingu á húð, í augum og öndunarvegi Valdið ofnæmisviðbrögðum við innöndun Verið skaðlegt ef það er innbyrt Þessi leikföng gera börnum kleift að búa til hluti sem storkna. Við vinnslu storknunar er notað fljótandi resín, sem er varasamt. Hættan liggur í meðhöndlun á fljótandi resíni. Resínið inniheldur efnin HEMA (hydroxyethylmethacrylate) og IBOA (isobornyl acrylate). Þessi efni eru ekki sérstaklega tekin fyrir í núgildandi leikfangareglugerð innan Evrópusambandsins. Framleiðandi vörunnar hefur sett fram frekari varúðarmerkingar á vöruna. Vörurnar hafa hins vegar verið innkallaðar í Bandaríkjunum og Kanada. Málið er í skoðun hjá ESB eins og er og frekari frétta af þeim niðurstöðum má vænta. Leikföngin hafa verið seld í KidsCoolshop, Hagkaupum og hugsanlega fleiri stöðum hérlendis. Við hvetjum notendur til að gæta fyllstu varúðar við notkun vörunnar.

Vakin er athygli á innköllun á spöng sem seld var í Flying Tiger Copenhagen. Spöngin er með einhyrningshorni, slöri og ljósi. Lokið á rafhlöðuboxinu er ekki nægilega vel fest og því geta börn komist auðveldlega í rafhlöður, ef börn setja rafhlöður upp í munn sér þá getur það valdið köfnunarhættu.

Vakin er athygli á varasamri púsl leikmottu með bókstöfum og tölustöfum. Púslmottan inniheldur alls 36 púsl. Leikmottan inniheldur smá hluti sem geta valdið köfnunarhættu. Varan var til sölu á vefsíðunni Wish. Grunur leikur á að leikmottan gæti verið í umferð á Íslandi.

Vakin er athygli á varasamri lyklakippu sem seld var á vefnum, sb. Wish. Lyklakippan er með áhengdan brúnan bangsa sem er með grænan skjaldbökubakpoka. Leikfangið hefur í för með sér köfnunarhættu fyrir börn. Litlir hlutir af lyklakippunni sjálfri geta losnað og valdið köfnunarhættu en einnig er blýinnihald í lyklakippunni sjálfri yfir mörkum. Saumar geta líka farið í sundur og börn komist í fyllingarefni bangsans sem getur valdið köfnunarhættu. Grunur leikur á að bangsinn gæti verið í umferð á Íslandi.

Vakin er athygli á hættulegu jólavasaljósi sem varpar jólamyndum. Vasajósið var selt í tveimur litum rauðum og grænum. Leikfangið hefur í för með sér köfnunarhættu fyrir börn eða getur skaðað meltingarveg þeirra þar sem börn geta auðveldlega opnað rafhlöðuhólfið og komist í hnapparafhlöður. Einnig er hvíti LED ljósgeislinn of sterkur og bein áhorf á geislan getur valdið sjónskaða. Vasaljósið hefur verið selt á vefnum þar með talið Shein, Alibaba, Amazon, Walmart og Temu. Grunur leikur á að leikfangið gæti verið í umferð á Íslandi.