Smelltu á vöruflokk eða leitaðu að vöru

HMS hefur borist tilkynning um innköllun á Joolz Aer2 bílstólafestingum vegna öryggisvanda sem getur komið upp við notkun. Samkvæmt tilkynningu frá framleiðanda Joolz geta festingarnar ekki alltaf læst sig rétt við Joolz Aer2 kerruna. Í ákveðnum tilfellum getur það valdið því að festingarnar losni við notkun, með þeim afleiðingum að bílstóll geti hallast fram eða fallið til jarðar. Varan sem innköllunin nær til ·       Vara: Joolz Aer2 bílstólafestingar ·       Vörunúmer: 320400 ·       Raðnúmer: NL311 ·       EAN: 8715688096512 ·       Sölutímabil: júní 2025 – maí 2026 Tekið er fram í tilkynningunni að innköllunin snýr eingöngu að Joolz Aer2 bílstólafestingunum. Joolz Aer2 kerran sjálf er ekki hluti af innkölluninni og er áfram talin örugg í notkun án festinganna. Eigendur eru beðnir um að hætta tafarlaust notkun á Joolz Aer2 bílstólafestingunum og farga vörunni á umhverfisvænan hátt. Skrá vöruna á innköllunarsíðu Joolz: https://service.joolz.com/s/car-seat-adapter-set-recall?language=en_US Joolz gerir ráð fyrir að endurbætt útgáfa af festingunum verði fáanleg frá byrjun júlí 2026. Að sögn fyrirtækisins er öryggi barna og foreldra í algjörum forgangi og er innköllunin framkvæmd af þeim sökum. Búið er að hafa samband við flesta kaupendur, en ekki hefur náðst í eigendur fjögurra eininga. Í tilkynningunni kemur fram að þrátt fyrir að verslun Mía sem dreifði vörunni sé lokuð er verið að koma upplýsingunum á framfæri til að tryggja að allir viðeigandi aðilar fái tilkynninguna sem fyrst. Fyrirtækið biðst velvirðingar á þeim óþægindum og áhyggjum sem þetta kann að valda.

HMS vill vekja athygli á barnaleikfangi í laginu eins og bíllykill með fjarstýringu, rafhlöðum og þremur lyklum. Leikfangið hefur verið tekið af markaði þar sem það stóðst ekki öryggiskröfur. Leikfangið getur festst í hálsi barns og valdið köfnun. Leikfangið var selt í gegnum Shein og hugsanlega fleiri vefverslunum. Talið er að leikfangið sé í umferð á Íslandi og eigendur leikfangsins eru hvattir til að hætta notkun leikfangsins sem fyrst.

HMS vill vekja athygli á öryggisatriðum vegna ungbarnaróla frá KREA, gerðir AN7G96 (2032) og AM59UB (2034). Í leiðbeiningabæklingi sem fylgdi rólunum vantar upplýsingar um hámarksuppsetningarhæð. Rólurnar má ekki setja hærra en 2,5 metra frá jörðu. Ef rólurnar eru settar upp í of mikilli hæð getur það valdið hengingarhættu við ákveðin skilyrði. Tryggja þarf einnig að fjarlægð frá aðliggjandi hlutum sé að minnsta kosti 2 metrar. Athugið að þessi tilkynning á við um önnur vörunúmer en sambærilegar rólur sem áður hafa verið innkallaðar. Einkenni þessara róla er að KREA stendur fremst á rólunni. Rólurnar voru seldar hjá Kids Coolshop og hugsanlega á fleiri stöðum hérlendis. Rólurnar  eiga ekki lengur að vera á markaði á Íslandi. Eigendur viðkomandi róla eru hvattir til að: Kanna hvort rólan sé af gerð AN7G96 (2032) eða AM59UB (2034) Rólurnar mega ekki fara í hærri fjarlægð frá jörðu en 600mm, vegna mögulegrar hengingarhættu. Staðfesta rétta uppsetningarhæð rólunnar, ganga úr skugga um að rólan sé ekki sett upp of hátt (<2,5m) og að næg fjarlægð sé frá nærliggjandi hlutum (2m) Hafa samband við söluaðila ef vafi leikur á um vöru eða uppsetningu