HMS hefur borist tilkynning frá Toyota um innköllun á Toyota Proace City árgerð 2022-2023. Hugbúnaðargalli getur leitt til þess að lesið séu rangar upplýsingar um spennu og hitastig rafhlöðunnar. Varnarkerfi bílsins bregst við með að slíta afli til mótorsins sem verður til þess að bíllinn stoppar. Eru eigendur beðnir um að hafa samband við Toyota til að panta tíma svo hægt sé að uppfæra hugbúnað.

HMS vekur athygli á innköllun á örbylgjuþolnum leirofni frá Søstrene Grene. Ástæða innköllunar er sú að hætta er á raflosti við meðhöndlun leirofnsins í örbylgjuofni. Þegar leirofninn er í örbylgjuofni getur örbylgjuofninn orðið rafleiðandi og notandi því orðið fyrir raflosti. Að auki getur skapast reyk og brunahætta við notkun leirofnsins í örbylgjuofninum. Eigendum leirofnsins er bent á að hætta notkun vörunnar þegar í stað. Hægt er skila vörunni í verslunum Søstrene Grene og fá hana endurgreidd að fullu.

HMS hefur borist tilkynning frá Öskju um innköllun á Kia Sorento MQ4 PE PHEV árgerð 2023-2024. Við framárekstur bifreiðar getur eldsneytisleiðsla farið í sundur og orsakað eldsneytisleka og aukna íkveikjuhættu. Samkvæmt Öskju fá eigendur boð í viðgerð með SMS skilaboðum. Askja tekur fram að eigendur geta pantað tíma í viðgerð hjá fyrirtækinu á vefslóðinni www.askja.is/innkollun-okutaekja. Viðgerðin felst í að setja brunavörn á eldsneytislögn til að koma í veg fyrir bruna við árekstur.

HMS hefur borist tilkynning frá Heklu um innköllun á Audi Q4 e-tron árgerð 2020-2023. Hætta er á að handbremsa virki ekki þótt ýtt sé á handbremsurofann. Beinir Hekla því til eigenda að hafa samband við þjónustuborð Heklu til að bóka tíma þar sem gallinn verður lagaður með hugbúnaðaruppfærslu.

HMS hefur borist tilkynning frá Brimborg um hættu í Ford Kuga PHEV bílum sem framleiddir voru á milli 2019 og 2023. Möguleiki er að háspennurafhlaða ökutækisins innihaldi gallaðar sellur sem gæti kviknað í ef skammhlaup myndast. Verið er að vinna að því að finna lausn en í millitíðinni vilja Brimborg og Ford koma þeim skilaboðum til notenda að hlaða ekki háspennurafhlöðu og nota eingöngu akstursstillinguna "Auto EV". Um er að ræða 100 eintök á Íslandi og hefur Brimborg sent póst á skráða eigendur bílana. Ef bíllinn þinn passar við lýsingu hér að ofan en þú hefur ekki fengið bréf getur Brimborg veitt upplýsingar um hvort bíllinn þinn sé í hættu.

Húsnæðis- og mannvirkjastofnun (HMS) vekur athygli á innköllun IKEA á nokkrum gerðum af LED útljósaseríum og útigólflampa úr vörulínunum LEDLJUS, SOMMARLÅNKE, STRÅLA, SVARTÅ og UTSUND. Þessar LED útiljósaseríur og útilampi eru með gallaðan rafmagnstengil sem stenst ekki öryggiskröfur og getur leitt til rafstuðs. Hægt er að þekkja þær vörur sem falla undir innköllunina á heiti LED spennubreytisins (ICPSH24-2-IL-1), dagstimplum á spennubreytinum (ÁÁVV : 2138, 2141, 2148, 2209, 2215, 2224, 2231, 2236, 2320, 2326, 2332, 2336, 2347, 2409, 2413, 2421, 2423, 2424, 2426, 2434, 2437) og heiti rafmagnstengilsins (SYK-02F). Vörur sem eru með annan spennubreyti, aðra dagstimpla og annan rafmagnstengil falla ekki undir innköllunina. Sjá nánar innköllun IKEA hér neðst í tilkynningunni.

HMS vekur athygli á innköllun á Girl's Kent Cupcake 16" reiðhjóli. Varan var seld í verslunum BYKO og hugsanlega fleiri stöðum. Ástæða innköllunar er sú að við skoðun á bremsupúðum kom í ljós að þeir innihalda asbest. Einnig kom í ljós að hjólið uppfyllir ekki kröfur staðalsins EN ISO 8098:2023 sem kveður á um öryggiskröfur varðandi reiðhjól fyrir ung börn. Við notkun hjólsins getur skapast hætta fyrir börn sem getur leitt til alvarlegra meiðsla. Eigendum reiðhjólsins er bent á að hætta notkun hjólsins þegar í stað. Ef reiðhjólið var keypt í verslunum BYKO má skila reiðhjólinu í næstu BYKO verslun.

Vakin er athygli á innköllun á trépúsli frá Jabadabado. Púslið er með 7 mismunandi púslum m.a. kanínu, einhyrning, svan, bangsa, regnboga, tungl og stjörnu. Hættan af púslinu er sú að eyrun á kanínunni geta auðveldlega brotnað af og börn nálgast smáa hluti sem geta valdið köfnun. Púslið var selt í BíumBíum hérlendis og hugsanlega á fleiri stöðum.

HMS vekur athygli á innköllun á Stanley kaffimálum. Tvær tegundir af kaffimálum eru innkallaðar, Trigger Action Travel Mug og Switchback Travel Mug. Hætta á brunaslysi getur fylgt notkun á kaffimálunum þar sem lok á kaffimálinu getur rýrnað við hita og tog, sem getur aukið líkur á að vökvi leki og valdið brunaáverkum. Töluverður fjöldi tilvika hefur verið skráð vegna slysa af völdum kaffimálanna. Notendum er bent á að hætta notkun á kaffimálunum þegar í stað. Vitað er að Stanley Trigger Action Mug var seldur hérlendis í Elko, Útilíf, Dimm, og ORG. Innflutningsaðili Stanley er Manna ehf. Neytendum er bent á að vera í sambandi við söluaðila til að fá afhent ný lok. Seld hafa verið 506 stk hérlendis af Stanley Trigger Action Mug. Einnig er hægt að hafa beint samband við Stanley í gegnum síðuna Home | Stanley Recall til að fá frekari upplýsingar. Innköllunin á við um 17 framleiðslunúmer sem sjá má frekar fyrir neðan. Framleiðslunúmerið má sjá á botni kaffimálsins

Vakin er athygli á innköllun á tréleikföngum sem eru grænmeti í trékassa sem seld voru í Flying Tiger Cophenhagen. Hættan af leikföngunum er sú að sumt grænmetið er ekki nógu vel fest saman. Það getur losnað í sundur og börn nálgast smáa hluti sem getur valdið köfnun. Seld hafa verið 118 leikföng hérlendis. Flying Tiger brást fljótt við og hóf innköllun hérlendis á leikfanginu í desember.

Með vörunni fylgdu ekki fullnægjandi notkunnarleiðbeiningar, við ákveðnar aðstæður getur rólan leitt af sér mögulega hengingahættu. Vegna þessa ágalla hefur framleiðandi ungbarnarólunar, Lillagunga, sent út frekari leiðbeiningar til að minnka áhættu á mögulegri hengingarhættu. Ef varan er hengd of hátt getur þríhyrningurinn fyrir ofan ruggustólinn skapað hættu á því að höfuð og háls festist. Slík aðstæða getur komið upp ef barn nær að klifra upp úr rólunni og reynir að fara niður með fæturnar á undan sér í gegnum umræddan þríhyrning. Líkaminn gæti komist í gegn, en höfuðið festst. Ef barnið finnur ekki fótfestu í þessari stöðu, getur þríhyrningurinn skapað köfnunarhættu. Til að forðast hættulegar aðstæður ítrekar framleiðandi vörunnar að notendur rólunnar verði að fylgja eftirfarandi leiðbeiningum Rólan skal hengd upp í hæðinni 35–36,5 cm frá jörðu. Öryggisbeltið verður alltaf að vera notað þegar rólan er í notkun. Barnið má aldrei vera eitt í rólunni. Hægt er að sjá frekari leiðbeiningar um rétta uppsetningu og notkun rólunnar á tengli neðst í tilkynningunni.

Vakin er athygli á innköllun á Mini matarstól. Hættan af matarstólnum er sú að hann getur oltið þegar bakið á stólnum er í hallandi stöðu. Barnið gæti orðið fyrir skaða ef stóllinn fellur aftur á bak. Unnið er með innflutningsaðila við innköllun vörunnar. Stólinn var seldur í verslun Ólavíu og Olivers. Eigendur stólsins eru hvattir til að hafa samband við Ólavíu og Oliver í gegnum netfangið oo@oo.is